በዘንድሮ አመት በአለም አቀፍ ደረጃ ለ26ኛ ጊዜ በሀገራችን ለ14ኛ ጊዜ የሚከበረው የአብሮነት ቀን በአዳማ ሳይንስና ቴክሎጂ ዩኒቨርሲቲ ለአምስት ተከታታይ ቀናት በሚቆዩ ልዩ ልዩ ዝግጅቶች እየተከበረ ይገኛል፡፡

በዛሬዉ ዕለት በአዳማ ሳይንስና ቴክኖሊጂ ዩኒቨርሲቲ መዝናኛ ክበብ በቡና ጠጡ ዝግጅት የተከናወነ ሲሆን ፕሮግራሙ በነገው እለትም በማስ ስፖርት አጓጊ ዉድድሮች እና በልዩ ልዩ ዝግጅቶች ደምቆ ይቀጥላል፡፡ የቡና ጠጡ ፕሮግራሙ በተለያዩ ሁለት ቦታዎች የተካሄደ ሲሆን የዩኒቨርሲቲው ሠራተኞች በመዝናኛ ክበብ እንዲሁም ተማሪዎች በአንፊ የመዝናኛ ሰፍራ አክብረውታል ፡፡

የዕለቱን መርሃግብር ያስተዋወቁት የዩኒቨርሲቲዉ የአስተዳደርና ልማት ም/ፐሬዚዳንት እና የዝግጅት ኮሚቴዉ ሰብሳቢ ዶ/ር ሰለሞን ጥሩነህ ናቸዉ፡፡ ስነስነርአቱን በመክፈቻ ንግግር የከፈቱት የአዳማ ሳይንስና ቴክኖሎጂ ዩኒቨርሲቲ ፕሬዝዳንት ዶክተር ለሚ ጉታ በንግግራቸው ባስተላለፉት መልእክት መላውን የዩኒቨርሲቲ ማህበረሰብ ለእለቱ እንኳን አደረሰን በማለት መልካም ምኞታቸውን በመግለፅ በሀገር አቀፍ ደረጃ በሚከበረው በዚህ ዝግጅት ብዙሀነትን ከመስበክ ባሻገር ብዝሀነትን መኖርን መልመድ ይገባናል ብለዋል ፡፡ ንግግራቸውን በመቀጠልም ብዙሃነትን መኖር በሚል መሪ ቃል በሚከበረው በዚህ የአብሮነት ሳምንት በአዳማ ሳይንስና ቴክኖሎጂ ዩኒቨርሲቲ ከ3000 በላይ ሰዎች በሚሳተፉባቸው ልዩ ልዩ ዝግጅቶች እንደሚከበር ጠቁመው እስከአሁን የመጣንበትን መልካም የመከባባርና የአብሮነት ሂደት በማጠናከር ሁሉም የዩነቨርሲቲው ማህበረሰብ የነቃ ተሳትፎ ማድረግ ይጠበቅብናል ብለዋል ፡፡