የአዳማ ሳይንስ እና ቴክኖሎጂ ዩኒቨርሲቲ ለ32ኛ ዙር ያስተማራቸውን 1387 ተማሪዎች ሰኔ 13 2018 ዓ. ም በአ.ሳ.ቴ.ዩ ሁለገብ አዳራሽ ምክትል ጠቅላይ ሚኒስትር አቶ ተመስገን ጥሩነህ ፣የኢንዱስትሪ ሚኒስቴር ሚንስትር አቶ መላኩ አለበል እና ከፍተኛ የመንግስት የስራ ሃላፊዎች በተገኙበት አስመርቋል ።
ምክትል ጠቅላይ ሚኒስትር አቶ ተመስገን ጥሩነህ እንደተናገሩት ዓለም በፈጣን የሳይንስና ቴክኖሎጂ እድገት፣ በዲጂታል ኢኮኖሚ መስፋፋትና በአካባቢ ጥበቃ ተግዳሮቶች ምክንያት ከፍተኛ

የለውጥ ግፊት ውስጥ እንደምትገኝ በመጠቆም ሀገራት ዘላቂ ልማትንና ዓለም አቀፍ ተወዳዳሪነታቸውን ለማረጋገጥ ለዕውቀትና ለፈጠራ ትኩረት መስጠት አማራጭ የሌለው ጉዳይ መሆኑን ለዝግጅቱ ታዳሚዎች አስገንዝበዋል።
በመቀጠልም ምክትል ጠቅላይ ሚንስትሩ ኢትዮጵያ አሁን የሚያስፈልጋት የቴክኖሎጂ ተጠቃሚዎች ብቻ ሳይሆኑ የሀገራችንንና የዓለምን ችግሮች ሊፈቱ የሚችሉ የቴክኖሎጂ ፈጣሪዎች፣ ባለራዕይ ተመራማሪዎችና ስራ ፈጣሪዎች ጭምር መሆኑንም አስገንዝበዋል።
ተመራቂዎች ራሳቸውን ሥራ ፈላጊ ብቻ ሳይሆኑ የስራ ዕድል ፈጣሪዎች አድርገው እንዲመለከቱና የመማራቸው እውነተኛ ዋጋ በማኅበረሰቡ ህይወት ላይ በሚያመጡት አዎንታዊ ተፅዕኖ እንደሚለካ በመገንዘብ በቀጣይ በሚሰማሩበት የሥራና የሕይወት መስክ ሁሉ ስኬትና መልካም እድል እንዲገጥማቸው ተመኝተዋል።
በተመሳሳይ የኢንዱስትሪ ሚኒስቴር ሚንስትር እና የአዳማ ሳይንስና ቴክኖሎጂ ዩኒቨርሲቲ የስራ አመራር ቦርድ ሰብሳቢ አቶ መላኩ አለበል በበኩላቸዉ ተመራቂ ተማሪዎች የሀገራቸዉን ምርትና ምርታማነት ለማሳደግና የ"ዲጂታል ኢትዮጵያ 2030ን" እዉን ለማድረግ የበኩላቸዉን እንዲወጡ ጥሪ አቅርበዋል፡፡
ሚኒስርሩ አያይዘዉም የአዳማ ሳይንስና ቴክኖሎጂ ዩኒቨርሲቲ ምሩቃን በትላልቅ ኢንዱስትሪዎችና ኩባንያዎች ዉስጥ በመሰማራት እያበረከቱ ላለዉ አስተዋፅዖ እውቅና ሰጥተዋል፡፡
የአዳማ ሳይንስና ቴክኖሎጂ ዩኒቨርሲቲ ፕሬዝዳንት ዶ/ር ለሚ ጉታ በበኩላቸዉ ከ2018 ዓ.ም ተመራቂ ተማሪዎች (1387) ዉስጥ 324ቱ ወይም 23.3% ሴቶች መሆናቸዉንና ዩኒቨርሲቲዉ በአለዉ ልዩ ካሪኩለም ተጠቃሚ ከሆኑት 9 ዱዋል ሜጀር/ማይነር ተማሪዎች መካከል 3ቱ ሴቶች መሆናቸዉን ተናግረዋል፡፡
በተጨማሪም ሴት ተማሪዎቻችን በትምህርታቸዉ አመርቂ ዉጤት ማምጣት ብቻ ሳይሆን ተምሳሌታዊ ስራን እየሰሩ መሆኑን አስገንዝበዋል፡፡
ይኸውም በዩኒቨርሲቲዉ የኤሌክትሪካል ፓወር ኤንድ ኮንትሮል ኢንጅነሪንግ (Electrical Power and Control Engineering) ተመራቂ ተማሪና የዋንጫ ተሸላሚ የሆነችዉ ሩት አባተ ከወሰደቻቸው 60 ኮርሶች መካከል 47ቱን 'A+' እንዲሁም የቀሩትን 13 ኮርሶች 'A' በማምጣት ሙሉ 4.00 (አራት ነጥብ) ያመጣችዉንና የፋርማሲ ዱዋል ሜጀር/ ማይነር ተመራቂ የሆነችዉን ተሊሌ ደሳለኝን መጥቀስ እንደ ማሳያ መዉሰድ እንደሚቻል ገልጸዋል፡፡
ዶ/ር ለሚ አያይዘዉም ለተመራቂ ተማሪዎች እዉቀታቸዉንና ክኅሎታቸውን ለህዝቦች መቀራረብ የሚያገለግሉ ድልድዮችን ለመገንባት እንዲጠቀሙበት አደራ ብለዋል፡፡
ተመራቂዎቹ በተለያዩ የትምህርት መርሃ ግብሮች በመጀመርያ ዲግሪ፣ በሁለተኛ ዲግሪ እና በሶስተኛ ዲግሪ ትምህርታቸውን በመደበኛና በተከታታይ ትምህርት ሲከታተሉ የቆዩ ናቸው።
የተማሪዎች ምርጥ የምርምር ፕሮጀክት ዉጤቶች በዝግጅቱ ታዳሚዎች የተጎበኙ ሲሆን በዚህ ስራቸው የተሻለ ዉጤት ላስመዘገቡ ተማሪዎች የእውቅናና የማበረታቻ ሽልማት ተበርክቶላቸዋል።